Тыдні беларускай мовы і літаратуры ў нашай школе заўсёды з’яўляюцца яркай і запамінальнай падзеяй. Не стаў выключэннем і гэты, які прайшоў з 19 па 24 лютага 2024 года пад дэвізам: «Мова родная — мова модная”. З мэтай прыцягнення ўвагі вучняў і іх бацькоў, педагогаў, грамадскасці да захавання і развіцця родный мовы, нацыянальнай культуры, яе традыцый, звычаяў і абрадаў быў складзены план тыдня.

Цікава і запамінальна прайшлі мерапрыемствы: фотамарафон “Інстаграм па-беларуску”, віктарына “Не проста ў словы я гуляю – на роднай мове размаўляю”, інтэрактыўны перапынак “Знаўцы беларускай мовы”, майстар-клас “Букет  кветак для роднай мовы”, флэшмоб “Беларусь мая сінявокая”, квэст “Лабірынты роднай мовы” і інш.

Але найбольш насычаным днём тыдня аказалася дваццаць першага лютага. І гэта невыпадкова. Дваццаць першага лютага адзначаецца Міжнародны дзень роднай мовы, таму вучні, настаўнікі, супрацоўнікі нашай школы актыўна далучыліся да святкавання. Усе разам стваралі воблака слоў “Маё любімае слова па-беларуску”. Весела і пазнавальна прайшла  акцыя “Адгадай беларускае слова – атрымай беларускую цукерку”, падчас якой не толькі вучні, але і настаўнікі пашылі свой лексічны запас беларускімі словамі, якія зараз вельмі рэдка ўжываюцца, ці ўвогуле не ўжываюцца. На працягу дня ўсе размаўлялі на беларускай мове.

Праведзеныя на працягу Тыдня мерапрыемствы садзейнічалі папулярызацыі беларускай мовы, павышэнню цікавасці навучэнцаў  да творчасці беларускіх паэтаў і пісьменнікаў, развіццю творчых здольнасцей школьнікаў, выхаванню ў вучняў нацыянальнай свядомасці, патрыятызму і любові да Радзімы, захаванню мовы як культурнай спадчыны беларускага народа.